Clik here to view.
Clik here to view.
Clik here to view.
Lögmaðurinn heldur því fram að uppi sé rökstuddur grunur um að Arnfríði skorti huglægt hlutleysi gagnvart sér vegna fyrri samskipta Brynjars og bróður hans við lögmanninn.
Jóhann Þorvarðarson skrifar:
Samkvæmt nýlegum úrskurði Landsréttar þá virðist sambands- og áhrifaleysi ríkja milli þingmannsins og eiginkonu hans Arnfríðar Einarsdóttur Landsréttardómara. Þar sem þau deila húsnæði mætti halda að búið sé að stúka heimili hjónanna af til helminga svo þau þurfi ekki að eiga orðaskipti. Þannig má skilja nýbakaðan úrskurð Landsréttar þar sem Arnfríður neitar að víkja sæti í máli sem Vilhjálmur H. Vilhjálmsson lögmaður rekur fyrir réttinum. Lögmaðurinn heldur því fram að uppi sé rökstuddur grunur um að Arnfríði skorti huglægt hlutleysi gagnvart sér vegna fyrri samskipta Brynjars og bróður hans við lögmanninn. Telur hann að það geti bitnað á skjólstæðingi sínum. Eins og þjóð man þá áttu sér stað hörð samskipti milli þessarar manna þegar Arnfríður var færð upp hæfnislistann með einu pennastriki þegar skipað var í Landsrétt við gangsetningu réttarins.
Höfnun Arnfríðar á kröfu Vilhjálms H. er hreint kostuleg. Segir hún ósannað að hún hafi neikvæða afstöðu til lögmannsins. Það hafi sko engin áhrif á hana þó eiginmaður hennar sé hugsanlegur fjandmaður lögmannsins. Að ekta maki og mágur hafi staðið í grimmu orðaskaki við Vilhjálm H. þegar Sigríður Andersen fyrrverandi dómsmálaráðherra skipaði Arnfríði sem dómara er ekki einu sinni aukaatriði. Það nær engu máli að mati Landsréttar! Arnfríður er sko ekki undir neinum áhrifum frá sínum nánustu. Og alls ekki frá eiginmanni sínum til áratuga enda virðist sem þau talist ekki við og hafa kannski aldrei gert. Hún er svo öguð að ekkert hreyfir við hennar járn-hlutleysi.
Arnfríður er sýnilega ekki heldur undir neinum áhrifum frá fjölmiðlum eða umræðum á samfélagsmiðlum þar sem Brynjar ekta maki er virkur. Og hún virðist alveg sérlega passasöm að fara aldrei inn á fésbókarsíðuna hans. Hún fylgist ekkert með honum, bara alls ekkert. Og hún fylgist heldur ekki með mági sínum. Í þessu samhengi þá töluðu þau líkast til ekkert saman þegar Arnfríður var færð upp hæfnislistann fræga sem Vilhjálmur H. gagnrýndi málefnalega. Hún er sko ekkert súr út í lögmanninn þó hún hafi þurft að víkja alfarið úr sæti dómara við Landsrétt þegar hann rak mál fyrir Mannréttindadómstól Evrópu og hafði glæstan sigur. Arnfríður var stödd í dómsal Mannréttindadómsstólsins, ef ég man rétt, þegar Vilhjálmur H. flutti sitt mál gegn ríkinu. Var hún líkast til að styðja við málflutning lögmannsins, eða þannig, þar sem hún sat nærri þáverandi dómsmálaráðherra. Nei, Arnfríður er öðruvísi en annað fólk, ónæm fyrir sínu umhverfi.
Ekki nokkur maður tekur mark á þeirri þvælu og því þvaðri sem kemur fram í úrskurði Landsréttar. Það er frá meiru að segja, en í þessari grein þá ætla ég ekkert að fjalla um sögu annars meðdómara Arnfríðar í úrskurðinum, Jóhannesar Sigurðssonar, frá hrunaárunum. Geri það kannski síðar, en legg fram þá spurningu hvort hann og eiginkona hans Heiðrún Jónsdóttir séu innmúruð?
Í málinu sem Vilhjálmur H. rekur þá fór það litla sem eftir var af rétti manna til hlutlausrar málsmeðferðar fyrir hlutlausum dómstól beint á öskuhaugana. Lubbamennin upp í Landsrétti eru þar með orðin í það minnsta þrjú, kannski fleiri. Segi frá því síðar. Fyrir á bekk voru Hervör Þorvaldsdóttir og Aðalsteinn E. Jónasson af kunnum ástæðum. Bekkurinn er orðinn ansi þröngt setinn, en ekki örvænta því búast má við því að Brynjar reddi þessu eins og öðru. Hann fær væntanlega aukafjárveitingu til að lengja vel í bekknum. Þá geta fleiri innmúraðir dómarar rottað sig saman og vanað stjórnarskrána endanlega.
