Það er ekki laust við að ég finni til með forystufólki ASÍ að þurfa hafa svona slappa viðsemjendur!
Jóhann Þorvarðarson skrifar:
Samtök atvinnulífsins (SA) eru svo áköf í eigin áróðri gegn launþegum landsins að þeir tapa sér algjörlega í vitleysunni. Hér að neðan er mynd sem SA birti í gær og á hún að sannfæra okkur um að rétt sé að falla frá óorðnum og umsömdum launahækkunum Lífskjarasamninga. Á myndinni er ein súla lituð svona til að skyggja á aðra hluta myndarinnar.
Á myndinni þá eru það aðrar súlur sem vöktu athygli mína frekar en þessi litaða launasúla. Til að gera langa sögu stutta þá stendur framleiðni undir hagnaði eða tapi fyrirtækja og hún endurspeglar hvort fyrirtæki er vel eða illa rekið. Lág framleiðni kallar á hærra söluverð og öfugt. Á myndinni segja stjórnendur fyrirtækja, sem þátt tóku í könnun SA, að framleiðni sé algjört aukaatriði og hafi ekki nema eitt prósent áhrif á verðákvarðanir. Sem sagt, þeim dettur ekki í hug að auka framleiðnina til að geta borgað betri laun og haldið verðinu í skefjum. Nei, launakostnaðinum er bara sjálfkrafa velt út í verðlagið. Þetta er vandinn í hnotskurn sem Ísland glímir við. Allt of mörg fyrirtæki sjá ekki lausnir heldur bara vandamál þegar gera á betur við launþega.
Samkeppnisstaða er sögð hafa lítil áhrif á verðákvarðanir fyrirtækja. Viðhorfið endurspeglar að á Íslandi vantar aukna samkeppni. Svo er það þetta með eftirspurnina, hún spilar litla rullu í verðákvörðunum. Það þarf nú ekki að hugsa þetta lengi til að sjá að aukin velta kallar fram betri nýtingu á föstum kostnaði. Hér má til dæmis nefna flugfélag sem stefnir á betri sætanýtingu til að ná fram lægri einingarkostnaði og möguleika á samkeppnishæfu verði. Það er ekki laust við að ég finni til með forystufólki ASÍ að þurfa hafa svona slappa viðsemjendur!
