Að tala um að forðinn standi í 970 milljörðum króna er tálsýn!
Jóhann Þorvarðarson skrifar:
Í viðtali á Stöð tvö þá fullyrti seðlabankastjóri ranglega að gjaldeyrisvaraforði landsins væri meiri í dag en hann var fyrir Covid-19. Hann gerir þau reginmistök að reikna til tekna hagnað af veikingu krónunnar það sem af er ári. Segir síðan forðann standa í 970 milljörðum króna. Málið er að varaforði seðlabanka er mældur í erlendum gjaldeyri, annars væri ekki um gjaldeyrisforða að ræða. Samkvæmt efnahagsreikning bankans þá stóð nettó forðinn við upphaf faraldursins í 5.380 milljónum Bandaríkjadala. Í ágústlok þá stóð forðinn í 5,306 milljónum dala og hafði því rýrnað um 1,37 prósent. Ef miða á ranglega við krónur þá verður að skoða nettó stöðuna því bankinn skuldar ríkissjóði 221 milljarða króna. Með sömu villuhugsun og bankastjórinn þá stendur forðinn í 749 milljörðum króna, en ekki 970 milljörðum, gróflega reiknað.
Ef tala á um forðann í krónum og telja til áorðinn gengishagnað þá er látið eins og gengishagnaðurinn sé innleystur. Svo er ekki. Þetta eru fuglar í skógi en ekki í hendi. Við innlausn þá á bankinn engan gjaldeyrisforða lengur og landið er berskjaldað. Sama á við ef krónan hefði styrkst frá upphafi faraldursins. Þá væri einnig rangt að tala um forðann í krónum og segja hann til dæmis vera 650 milljarða króna. Svo er það hitt að þessi forði er ekki allur tiltækur í inngrip á gjaldeyrismarkað til að verja krónuna eins og seðlabankastjóri gefur til kynna. Helsta hlutverk forðans er að tryggja greiðslur fyrir innflutning og fjármagnsflæði ef upp kemur markaðsbrestur. Að tala um að forðinn standi í 970 milljörðum króna er tálsýn!