Hugmyndir dónaflokksins eru best geymdar á Kolbeinsey þar sem öldurnar drekkja þeim í einum hvelli.
Jóhann Þorvarðarson skrifar:
Yfir-Klausturdóni Miðflokksins Bergþór Ólason var eins og steingervingur í Kastljósi kvöldsins. Talaði um að skera niður hjá hinu opinbera og leggja Sundabraut til að minnka vaxandi atvinnuleysi. Fyrri hugmyndin tilheyrir hagstjórn sem hefur verið aflögð, en Klausturdóninn taldi sig hafa fundið upp hjólið. Meira að segja Bandaríkjamenn eru búnir að kveikja í þessari hugmynd sem viðbrögð við kreppu og jarðsetja öskuna. Hugmyndin kemst ekki einu sinni í endurvinnslu. Seinni hugdetta Klausturdónans var að hefja byggingu Sundabrautar. Vandinn við þessa hugmynd er að hún tekur langan tíma að virka og dregur seint úr atvinnuleysi.
Eins og ég hef oft bent á þá hækkuðu bandarískir þingmenn atvinnuleysislaun um 331 þúsund krónur á mánuði í fimm mánuði vegna Covid-19. Nú nýlega var annað fimm mánaða tímabil að hefjast og atvinnuleysislaun voru hækkuð um 221 þúsund krónur á mánuði. Þetta er aðgerð sem virkar strax á eftirspurnarhliðina. Einkaneysla rauk upp og atvinnuleysi minnkaði um 29 prósent. Hugmyndir dónaflokksins eru best geymdar á Kolbeinsey þar sem öldurnar drekkja þeim í einum hvelli. Dónarnir átta sig ekki á að verðmæti verða ekki til án eftirspurnar!