Vilhjálmur ku vera á leið í heimsreisu til að halda röð fyrirlestra hjá helstu seðlabönkum og háskólum veraldar í ljósi þess að nýtt stýritæki seðlabanka er komið fram.
Jóhann Þorvarðarson skrifar:
Verkalýðsformaðurinn knái á Akranesi hampar sér í nýlegri færslu á eigin fésbókarsíðu. Þakkar Lífskjarasamningum fyrir miklar vaxtalækkanir sem orðið hafa. Efnahagslegar afleiðingar Covid-19 faraldursins spiluðu enga rullu hér að mati þessa knáa garps enda litu seðlabankar heimsins eingöngu til hins mikla samnings Vilhjálms þegar grunnvextir voru kýldir niður í núll prósent í heiminum. Vilhjálmur ku vera á leið í heimsreisu til að halda röð fyrirlestra hjá helstu seðlabönkum og háskólum veraldar í ljósi þess að nýtt stýritæki seðlabanka er komið fram. Erlendis vill fólk heyra hvernig Vilhjálmurinn mikli fór að því að ná fram straumbreytandi kjarasamningi og setja Ísland í forystu við ákvörðun vaxtarstigs í heiminum. Já, Ísland er sko stórasta land í heiminum!