En svo gekk hann í bláa liðið í Valhöll hinum megin Miklubrautar, frá Hlíðunum séð.
Jóhann Þorvarðarson skrifar:
Það er gullöld hjá Brynjari Níelssyni þingmanni Sjálfstæðisflokksins enda er hann sverð og skjöldur markaðslausna. Hefur óbilandi trú á öllu sem heitir einkaframtak vegna þess að Martini Rosso er afsprengi ítalsks hugvits frá héruðum Tórínó. Hann á þeim Martini og Rossi ljúfar stundir að þakka og einstaka heimssýn. Félagarnir þróuðu þennan rauða vermút óáreittir frá ríki og sveit á nítjándu öldinni. Að mati Brynjars þá hefur drykkurinn bara batnað á þeim 150 árum sem liðin eru. Rauði liturinn hefur alltaf fallið Brynjari vel í geð því sem ungur garpur hóf hann að æfa og spila í rauðum Valsbúningi. Svo mikil var ást Brynjars á rauða litnum að lungann úr menntó gekk hann alltaf í rauðri íþróttaúlpu og las Karl Marx í akkorði. En svo gekk hann í bláa liðið í Valhöll hinum megin Miklubrautar, frá Hlíðunum séð.
Í dag þá hefur garpurinn losað sig við himinn blámann enda lausnarorðið „fyrirtækja-sósíalismi“. Skítt með markaðslausnir. Milljarða tugum er nú sáldrað úr ríkissjóði yfir fallandi fyrirtæki. Já, það er stundum sagt að lífið gangi í hringi og það á svo sannarlega við um tískulitina. Klæðist Brynjar nú rauðu frá toppi til táar með Rossi á vör um leið og gluggað er í skrudduna.