Hvað ætli jafnöldrum Helga Ingólfs finnist um að þurfa að taka þátt í að borga lúxuslíf Helga Ingólfs næstu fimm árin?
Jóhann Þorvarðarson skrifar:
Helgi Ingólfur Jónsson hæstaréttardómari hefur sótt um lausn frá starfi um leið og hann verður 65 ára á vormánuðum. Hann heldur fullum launum til 70 ára aldurs án vinnuskyldu. Þarna krækir hann sér í 132 milljónir.
Við almúginn þurfum að bera kostnaðinn, þar á meðal er láglaunafólk, sjúklingar, öryrkjar og fatlaðir. Já, og líka þroskaskertir. Ef Helgi Ingólfur myndi kjósa að vinna til 70 ára aldurs eins og aðrir landsmenn þurfa að gera þá væri til dæmis hægt að nýta þetta fé í bættan rekstur Slysa- og bráðadeildar Landsspítalans. Nú eða hækka lágmarkslífeyri 110 eftirlaunaþega um 20.000 krónur á mánuði í fimm ár. Þeim hópi munar um minna.
Hvað ætli jafnöldrum Helga Ingólfs finnist um að þurfa að taka þátt í að borga lúxuslíf Helga Ingólfs næstu fimm árin?
Miðað við lægstu laun í landinu þá tekur það láglaunakonu 31 ár að vinna sér inn 132 milljónir! Ætlar einhver að halda því fram að Helgi Ingólfur sé 31 ári verðmætari en konan sem skúrar óþrifnaðinn undan dómaranum í húsakynnum Hæstaréttar? Nú eða karlinn sem þrífur óhreinindin eftir hann í líkamsræktinni?