Það er lang best að nota sömu meðul og sérfræðingarnir og svæla borgina til sómasamlegra kjarasamninga.
Jóhann Þorvarðarson skrifar:
Ef þú ert í aðstöðu að geta stofnað einkahlutafélag utan um þitt vinnuframlag, t.d. lögfræðingur, smiður, læknir eða pípari, þá getur þú lækkað eigin skattbyrði um allt að 28%. Á sama tíma greiðir til dæmis leikskólakennari fullar álögur. Þetta þýðir að launþegar niðurgreiða tekjuskatta sérfræðinganna sem skipta þúsundum í landinu.
Ef skattkerfið væri ekki svona bjagað og til hagsbóta fyrir suma þá væri hægt að lækka skatta hjá öllum. Helst af öllu hjá þeim sem ekki ná endum saman! Núverandi skipulag er hreinræktaður fyrirtækja-sósíalismi. Þessir skattalegu lúxusfarþegar ríða um á bökum almúgans, en nota samt alla innviði jafnmikið ef ekki meira! Þetta eru svona séra Jónar sem Bjarna Ben þykir vænna um en aðra.
Ég tel að Efling geti leyst kjaradeiluna án aðkomu borgarinnar. Hreinlega slegið vopnin úr höndum meirihluta borgarinnar. Efling byrjar bara strax að aðstoða hvern og einn leikskólakennara við að stofna einkahlutafélag. Þeir skilgreina sig bara sem utanaðkomandi sérfræðinga eins og þekkist til dæmis hjá háskólum landsins. Þannig geta leikskólakennarar lækkað skattgreiðslur sínar og aukið þar með ráðstöfunartekjurnar. Á sama tíma mun ríki og borg fá minni skatttekjur frá þessum mikilvæga þjóðfélagshóp.
Það er lang best að nota bara sömu meðul og sérfræðingarnir og svæla borgina til sómasamlegra kjarasamninga. Skatturinn í landinu getur ekkert aðhafst vegna þess að gjörningurinn er löglegur. Á endanum verður ríkisstjórnin að afnema þennan fyrirtækja-sósíalisma og hanna skattkerfi þar sem engum er í sjálfsvald sett hvað viðkomandi borgar í tekjuskatta. Þannig næst fram bæði aukin jöfnuður og meiri sátt í samfélaginu!