Pælið í ruglinu. Ásmundur Einar bóndi og félagsmálaráðherra er sáttur með sitt.
Jóhann Þorvarðarson skrifar:
Bóndi og ekki bóndi það er ólíkur hlutur í augum ríkisstjórnarinnar. Hún fer í stíft manngreiningarálit.
Samkvæmt opinberum upplýsingum fær hver sauðfjárbóndi að jafnaði 300.000 krónur á mánuði frá ríkissjóði. Bóndinn hirðir síðan allar sölutekjur afurða sinna. Hagnaður sauðfjárbóndans af lambakjötssölu er 533.000 krónur á mánuði að meðaltali. Málið endar ekki hér. Bóndinn getur aflað sér annarra tekna án þess að peningagjöfin skerðist um eina krónu. Það er vel þekkt að fjölmargir sauðfjárbændur afla sér annarra tekna, t.d. af ferðaþjónustu, veiðiréttindum eða með hlutavinnu utan búsins. Þær tekjur leggjast ofan á hagnaðinn og veldur það engum skerðingum á peningagjöf ríkisins!
Svo má ekki gleyma að bóndinn þarf ekki að kaupa sitt lambakjöt út í búð. Hann fær niðurgreitt kjötið beint frá sláturhúsinu eða með heimaslátrun. Það má því segja að ríkisstjórnin með bóndasoninn Ásmund Einar sem félagsmálaráðherra taki þátt í einkarekstri sauðfjárbænda og tryggi þeim gott lífsviðurværi. Þetta er svona afkomutrygging á vegum ríkisins.
Og bændur fá meira. Í gegnum Fjarskiptasjóð er miklum peningum útdeilt til að ljóstengja hinar dreifðustu byggðir landsins í gegnum verkefnið Ísland ljóstengt. Samkvæmt opinberum upplýsingum losar fjöldi styrkhæfra bygginga töluna 6.000. Þar inni eru bændur. Hér er sem sagt verið að gefa hverjum bónda 417.000 krónur til að fá sína ljóstengingu heim í hús. Það skal upplýst að ekki eru allar götur í þéttbýlum komnar með ljóstengingu og treysta á koparsímavírinn.
En ríkisstjórnin á sér ljóta hlið. Hún er haldin alvarlegum fordómum í garð fátækra, okkar verst settu systkina. Um leið og til dæmis fatlaður einstaklingur gerir tilraun til að vinna inn aukapening til að koma sér upp úr sultinum lendir viðkomandi í strangri skerðingu. Tökum einfalt dæmi. Sigga er fötluð og vinnur sér inn aukalega 40.000 krónur fyrir skatta. Hún heldur eftir 8.828 krónum. Sem sagt, hún borgar 78% í skatta og skerðingar. Ef Sigga nær að vinna sér inn 100.000 krónur þá fara 77% í skatta og skerðingar.
Já, það er ekki sama bóndi og ekki bóndi í augum ríkisstjórnar Katrínar Jak.
Pælið í ruglinu. Ásmundur Einar bóndasonur og félagsmálaráðherra er sáttur með stuðninginn við sauðfjárbændur um leið og hann skammtar öryrkjum minna en hungurlús. Segist ekkert geta gert til að leiðrétta nýjustu skerðingarnar sem tengjast dráttarvöxtum öryrkja! En stéttarbræður hans bændurnir eru kátir. Halda sín réttarböll glaðbeittir nú um stundir með fulla vasa fjár!
Svo er öruggt að hagsmunagæslumenn bænda í fjárlaganefnd, formaðurinn Willum Þór Þórsson framsóknarmaður og varaformaðurinn Haraldur Ben stórbóndi vilja engu breyta enda hagur bænda góður!
Þessi frétt Ríkisstjórnin gerir vel við bændur! birtist fyrst á miðjan.is.