Sigurður Ingi ætlar sko að sýna að hann er alvöru karl í krapinu.
Jóhann Þorvarðarson skrifar:
Það má lesa mikið úr fasi manna. Og enn meira úr orðum þeirra. Frá Sigurði Inga Jóhannssyni formanni Framsóknarflokksins streymir blær uppgjafar. Hann birtist manni eins og úrvinda hani sem hænurnar eru hættar að líta til. Hann virðist þreyttur, eldmóðurinn horfinn.
Ástandið var sérstætt í kringum nýlega umræðu um veggjöldin. Þá töldu margir landsmenn Jón Gunnarsson alþingismann Sjálfstæðisflokksins vera samgönguráðherra. Á endanum talaði Sigurður Ingi gegn eigin kosningaloforði um engin veggjöld eins og vindhani. Þá fattaðist hver átti að vera samgönguráðherra eða svona hér um bil.
Ekki gengur honum betur í umræðunni um innflutning á ófrosnu kjöti. Hann er lítt sannfærandi og rödd hans eins og hvert annað fánýti.
Í umræðunni um dóm Mannréttindadómstólsins hefur fánýtið haldið áfram. Ekkert heyrst frá honum varðandi lausnir í þessu grundvallarmáli Íslendinga.
Svo vanmáttugur er Sigurður Ingi orðinn í augum kjósenda að hann sér sig knúinn til að snúa vörn í sókn. Nú skal landsmönnum sýnt úr hverju dýralæknirinn er gerður. Læknirinn sem geldir hross í frístundum eins og frægt er orðið. Sigurður Ingi ætlar sko að sýna að hann er alvöru karl í krapinu.
Ræðst dýralæknirinn í þessu skyni á garðinn þar sem hann er allra lægstur, eða þar sem enga vörn er að finna. Nú verða fjárframlög til fatlaðra skorin hressilega niður. Nú skal sparkað í liggjandi mann og það beint í hjálmlaust höfuðið. Hann Sigurður Ingi er auðvitað stórmenni enda formaður Framsóknarflokksins. Mennskan uppmáluð í sínum dýrlegustu sumarlitum. Til hamingju allir þeir sem enn þá eru framsóknarmenn.
Þessi frétt Heillaóskir til Framsóknarflokksins! birtist fyrst á miðjan.is.